காதல் மழை..

தேவதைக் கனவு

2012-01-08T16:01:00.000+05:30

நீ என்னை பார்க்க வேண்டாம்,
உன் நிழலையாவது
என் மீது விழும்படி செய்துவிட்டு போ..

நீ வரையும் வரை அழகாய் தெரியும் கோலம்,
நீ எழுந்து போன பின் அழகு இழக்கிறது..

குழந்தைகளின் கனவில் தேவதைகள் வருமாமே..
அதனால் தான் எல்லாக் குழந்தைகளும்
உன்னிடம் உடனே ஒட்டிக் கொள்கின்றனவா?

மருத்துவமனையில்
நீ பிறந்த அறை எதுவென்று
தெரிந்தால் சொல்..
என் காதல் தேசத்து கடவுள் பிறந்த இடத்துக்கு
புனித யாத்திரை சென்று வருகிறேன்..

எனக்கு மட்டும் சக்தி இருந்தால்,
நீ சின்ன வயதில் பிடித்து விளையாடிய
பட்டாம்பூச்சியாய் மாறியிருப்பேன்...

நீ கோவில்களுக்கெல்லாம் அடிக்கடி போகாதே..
தேவர்களோடெல்லாம்
என்னால் போட்டி போட முடியாது...

இலையுதிர்கால மரங்கள் கூட
நீ நின்றால் பூ உதிர்க்கின்றன..

ஏன் குடை பிடித்தாய்?
பார்! கோபத்தில் சூரியன் எங்களை சுடுகிறது...

நான் என்ன அவ்வளவு அழகா என்று உதடு சுளித்தாய்...
இன்னும் கொஞ்சம் அழகு கூடி விட்டிருந்தது...

அழகு சாதனப் பொருட்களின்
விளம்பரங்களையும், அழகிப் போட்டிகளையும்,
பார்க்கும் பொழுதெல்லாம்
நீ என்ன நினைப்பாயோ எனக்கு தெரியாது..
நான் ஏளனமாக உள்ளுக்குள் சிரித்துக் கொள்கிறேன்..

சாட்சி!

2011-04-20T10:00:00.001+05:30

சிந்தை நிறைத்து
வாலிபம் ஊடுருவும்
கருவ‌றையின்
பெருஞ்சுவரில்

மோதி,மோதியென்
குருதி இழக்கிறேன்.
இன்னதென‌ச் சொல்ல‌
முடியா வண்ணத்தில்
இருந்ததென் குருதி.

சுவரைக் குருதியின்
நிறம் கவரத்
தொடங்கிய கணத்தின்
முடிவில்,

என்னுள் நீயில்லை.

உன்னை அழைத்துச்
செல்ல,அவ்வறை
நோக்கி வந்த
காற்றுக்கு சாட்சியாய்
சிறகடிக்ககிறது,
படுக்கையில் உதிர்ந்த
உன்
ஒற்றைக் குழல்.

-♠ராஜூ♠

தேடல்..

2011-03-15T23:07:00.001+05:30

மனப் பாலையின்
சுடுமணல்
பாதச் சுவடுகளில்
எங்கிருக்கிறது எனக்கான
கொலுசு
அணிந்த பாதத்தின்
சுவடு.

மழை
கொண்டு போயிருக்கலாம்.
காற்றினால்
சிதறியிருக்கலாம்.
எதுவாகினும்,
மீட்டெடுக்க முடியாத
தருணங்களின்
தொகுப்புதான் காதல்!

-ராஜூ

முத்தப் பிசுபிசுப்பு..

2010-12-07T10:37:00.000+05:30

இலக்கையடைந்த கப்பலின்
நங்கூரப் பாய்ச்சலினுடைய
அதிர்வுகள் கடலினுள்ளிருந்து
மேலேறி ஒலிக்கும் வெளியில்,
மிதந்து வந்தது அன்றவள்
அனுப்பிய முத்தமொன்று.

இராஜாளிப் பறவையின்
அலகையொத்தென்
அதரங்கள் குவித்து
நான் அனுப்பிய முத்தத்தின்
பயணம் அமைந்ததுமதை
நோக்கியே.

இவ்விரண்டும் இணைந்த
தருவாயில், ஆகாயம்
கிழிந்து பொழிந்தது
ஆலங்கட்டி மழை.

மழையின் வாசமடங்கிய
பிறகான வளியில்,
இன்னமும்
முத்த எச்சிலின் நெடி
கலந்த பிசுபிசுப்பானது
காதலாய்
கனந்து கொண்டிருக்கிறது.

-♠ராஜூ♠

துளியில் சிதறிய முகம்!

2010-07-16T10:14:00.001+05:30

வானமுடைந்துத் தெறித்த திரவத்
துகள்களென் தலை தொட,
கேசம் விட்டு நாசி நுனி வந்த
துளியொன்று நிலம் நனைத்த
நாளில்தான் மறைந்து போனாளவள்!

கண்ணுயர்த்தி நிமிர்ந்த போது,முகம்
தொட்டுச் சிதறியதோர் துளியில்
அவளின் முகம்!

இப்போது நிலம் விழுந்த துளி,
நில நாக்கை உவர்க்கச் செய்திருக்கலாம்.

-♠ராஜூ♠

உறைந்த கடிதம்..

2010-03-27T12:23:00.002+05:30

துயிலில்லா இரவுகள்,
புறங்கை தாங்கிய
முகவாய்களுடன்
நீள்கின்றன.
நகம் கடித்தலிலும்
பொழுதுகள் கழியத்தான்
செய்கின்றன.
மௌனம் களைந்து..
உனக்கான எழுத்துகளை,
பேனாவிலென் ரத்தம் ஊற்றி
மேகங்களின் உடலில்
எழுத முயல்கிறேன்.
பேனாவினுள் அதுவும்
உறைந்து நிற்கிறது.
என் காதலைப் போலவே..!
கூடவே கடிதமும்.

-♠ராஜூ♠

உதிரா(ர)க் காதல்..!

2010-03-05T23:31:00.001+05:30

உறவுகளனைத்தும் உதிர்ந்து போதும்,
நீ மட்டும் மறக்க மறுக்கிறாய்
என் காதலெழுந்து தாண்டவமாட.
எனக்கு கடந்த காலமே இல்லையென
கண்ணீர் கொண்டு நுரை பொங்க
அழுத்தித் துடைத்தெறிந்தும்.

என் மனதைக் கொய்யும்
வாலிப வாசனைகளோடு
கூடிய நினைவுகளுடன்
நீ நகர்ந்து செல்கிறாய்.
மனச்சுவரின் குறுக்கே ஓடியோடி
ஒளிந்து விளையாடுகிறாய்.

விசாரணைகளின்றி நீ
கொடுத்த சொற் தண்டனைகளின்
பெயரில் ஏற்பட்ட வடுக்களில்
வலியெனும் குறுக்கு விசாரணைகள்
இன்றளவும் இருக்கின்றன.

வக்கீல் வேண்டாம் வாதாட,
என் காதல் உள்ளது.காலத்தின்
தீர்ப்பை வெல்ல..
உன்னுடையதையும்..!

-♠ராஜூ♠

காதல் இலர் தினம்.....

2010-02-14T16:02:00.004+05:30

காதலருக்கு

தினம் தினம்.

காதல் இலருக்கு

ஒரு தினம்.

--------------------------------

கண்களின்

புணர்ச்சியில்

கருக்கொண்டது

காதல்.

-------------------------------------

காதல்

செய்த பாவம்

கல்யாணம்

செய்தால் போகும்

-----------------------------------

எவர் அறிவார் எவர் அறிவார்

காதல் வரும் நேரம்

காலன் வரும் நேரம்

எவர் அறிவார் எவர் அறிவார்

---------------------------

கண்ணிருந்தும் குருடராய்

காதிருந்தும் செவிடராய்

வாயிருந்தும் ஊமையராய்

காதல் இருந்தும் இல்லாமல்

கலியுக காதலர்.

எல்லாம் காதல் மயம்.!

2010-02-14T00:26:00.000+05:30

அன்புள்ள பிரியாவுக்கு,
உனக்கு இது நான் எழுதும் 22 வது கடிதம்.ஆம்,21 கடிதங்களை உன்னிடம் கொடுக்கவே இல்லை என்பது எனக்கும் என் பேனாவுக்கு மட்டுமே தெரிந்த உண்மை.நாம் காதலிக்க ஆரம்பித்து இன்று வரை ஆறு வருடங்கள்,மூன்று மாதம் ஆகின்றது.படிக்கும்போது அனைத்துப் பாடங்களையும் ஒரே அட்டம்ப்டில் தூக்குபவனையே ரசித்த பெண்களின் மத்தியில் "அரியரைத் தூக்குவதே அரிது" என்றிருந்த என்னை ஏன் காதலித்தாய்..? அன்று முதல் தேடிப் பார்க்கின்றேன், என்னிடம் உன்னை ஈர்த்தது எதுவென்று.எனக்கு மட்டும் தெரியவில்லை. நோட்புக்குகளில் நீ “பிரியா செந்தில்” என்றெழுதி மறைத்து வைத்திருந்ததைப் பார்க்கும் நேரமெல்லாம் மௌனமாக அழுதிருக்கின்றேன்.

இந்த ஆறு வருடங்களில்தான் எத்தனை ஊடல்கள்,சண்டைகள்,குடும்பச் சங்கடங்கள்...? அதனால்தான் முடிவெடுத்துவிட்டேன் உன்னை விட்டு பிரியலாம் என்று.எப்போது பார்த்தோம்.பழகினோம்.எல்லாம் இன்னும் என் நெஞ்சில் பசுமரத்தாணியாகவே இருக்கின்றது. மதுரையில் நாம் சுற்றாத இடங்கள் பாவம் செய்திருக்கக் கூடும்.அந்த நினைவுகள் போதும். அவற்றை தின்று விழுங்கிக் கொண்டே இருந்துவிடுவேன்.

உன்னைப் பிரிந்து என்னால் இருக்க முடியுமா..? என்ற‌ கேள்வி இருப்பின், அதற்கு 'இல்லை'என்பதுதான் எனது பதிலாக இருக்கும்.என்ன செய்ய,நான் கோழைதான். இந்த திடீர் முடிவுக்கு என்ன காரணம்.? என நீ கேட்காவிட்டாலும் நான் என் பதிலைச் சொல்லிவிடுகின்றேன்.

பயம்தான். இனி நம் வாழ்க்கை என்னவாகும் என்கிற ஒரு இனம்புரியாத பயம்தான்.என் வீட்டிலோ நான் காதலை சொன்னாலும் சொல்லாவிடினும் ஒரே நிலைமைதான்.ரேசன்கார்டில் மட்டுமே என்வீட்டில் வாழ்கின்றேன். ஆனால், உன் வீட்டில் உன் அப்பாவோ சொந்தங்களோ இந்த ஜென்மத்தில் சம்மதிக்கமாட்டார்கள். உன் பெற்றோர்களைப் பழித்து, குற்ற உணர்ச்சியோடு வாழும் வாழ்வு எனக்கு பிடிக்கவில்லை.? நான் உன் பெற்றோரின் மனதை உடைக்க விரும்பவில்லை என்பதே பிரதான காரணம். நீ ஆயிரம் சமாதானங்கள் சொன்னாலும் இதுதான் என் பதில்.அது என்னவோ தெரியவில்லை,காதலிக்கும் போது இதைப் பற்றிய சிந்தனை வரவே இல்லை.நாமும் சினிமாக் காதலர்களைப் போல இருந்து விட்டோம்.வாழ்க்கைப் பற்றிய பயம் வரும்போதுதான் இப்படியெல்லாம் சிந்திக்கத் தோன்றுகிறது. பிரிந்தால் மட்டும் எல்லாம் சரியாகி விடுமா..? எனில்,இந்த நானோசெகண்ட் வாழ்க்கையில் "எல்லாம் சரியாகி விடும்". இதை ஏனோ என்னால் உன்னிடம் நேரில் சொல்ல முடியவில்லை. அதனால்தான் இந்தக் கடிதம்.

இப்படிக்கு,
செந்தில் வேல்.

இப்படி ஒரு கடிதத்தை எடுத்துக் கொண்டு,சென்னையிலிருந்து பாண்டியனில் வரும் தன் காதலியான பிரியாவைப் பார்க்கச் சென்றான் செந்தில்.கோச்சிலிருந்து இறங்கும் அவள் கண்களின் தேடலுக்கு பதிலாக,அவள் முன் சென்று நின்றான்.அவனைப் பார்த்து அவள் விட்ட் ஒற்றைத்துளி கண்ணீரில்,அந்தக் கடிதத்திற்கு தன் பேன்ட் பாக்கெட்டிலேயே 22 வது முறையாக‌ கல்லறை வைத்தான்.

-♠ராஜூ.♠

நன்றி..!

2010-02-08T12:27:00.001+05:30

முன்னாள் காதலியை
ஒவ்வொரு முறையும்
கணவனுடன்
எதிரில் பார்க்க நேரும் போதெல்லாம்,
வராத அழைப்பை ஏற்கும்
தொனியில் செவியில்
அழுத்தும் செல்ஃபோன்.

அவள் என்னைத் கடந்து்
சென்ற பின், மெல்ல
முகம் தூக்கித் திரும்பி
உற்று நோக்கத் தூண்டும்
செல்லரிக்கா காதல்
கொண்ட மனம்.

அவள் கணவனை தனியே
பார்க்க நேரும் போது,
பற்றிக்கொண்டு வரும்
பொறாமையுடன்
கலந்த கோபம்.

வீடு வந்ததும் மனைவியின்
சிரிப்பிலும், உணவு பரிமாறும்
அந்த அன்பிலும் பட்டுத்
தெறிக்கின்ற என் பயம்
கலந்த இயலாமை.

கழுத்தைத் தாவி தொற்றிப்
பிடித்துக் கொள்ளுமென்
குழந்தையின் பிஞ்சுக்
கைவிரல்களால் தூண்டப்படும்
பொறுப்புணர்ச்சி.

தனியறையில்,படித்து
பாதுகாக்கப்படும்
என் காதல் கலந்த
கடிதக்காகிதங்கள்,
வாழ்த்தட்டைகள்.

இவையனைத்திற்கும்
நன்றி சொல்ல கடமைப்
பட்டிருக்கிறேன்,ஒவ்வொரு
முறையும் எனக்கென்
பழைய காதலை
நினைவுப்படுத்துவதற்காக..!

Next மீட் பண்ணுவோம்
♠ராஜூ♠

காதல் கடிதங்கள்..

2010-01-29T16:54:00.002+05:30

கனவே கனவே
என் கனவெல்லாம் நீயே...

அசுரனே வந்தாலும்
அசராத என்னை
சிறு புன்னைகையாலே
வெட்டி சாய்த்தாய்...

நீ நடக்கும் வீதியில்
தூசியே இருக்காது
நீ வருவாய் என்று
நூறு முறை
நான் கடந்து போவதால்...

நீ இருக்கும் இடத்தில்
வெயில் இருக்காது
நிழலாய் உன்னை
நான்
தொடருந்து வருவதால்...

நீ தூக்கி ஏறியும்
குப்பைக்குக்கூட
கால் இருக்கிறது
என் அறையில் எப்படியோ
அது குடி புகுவதால்...

என் வீட்டு கண்ணாடி
பொய் சொல்கிறது
அதில்
என்னைக் காணாமல்
உன்னைக் காண்பதால்

உன் பார்வை தூண்டிலில் தவிக்கும் மீன் நான்
ஆனால் இன்னும்
தூண்டிலைத்தான் காதலிக்கிறேன்

என்னைத் துண்டு
துண்டாக்கிவிட்டு நீயோ
தூரமாய் போகிறாய்...

தூக்கத்தைத் தொலைத்து நான்
திருடனாய் விழிக்க
உன்னிடம் கொடுக்காத
என் காதல் கடிதங்கள் மட்டும்
சுகமாய் தூங்குகின்றன
என் படுக்கை அறையில்...!!!

காதல் செரிக்காது...!

2010-01-27T11:28:00.000+05:30

நான் உன்னைக் காதலிக்கிறேனென்று
உன்னிடம் வரும்போது
நீ பார்க்கும் பார்வையையும்
முடியாதென வந்து
விழப்போகும் சொற்களையும்
அப்படியே விழுங்கிவிடு.

என்னைப்பார்த்து
இதுவரை நீ சிரிக்கவேயில்லை
என்பதை மட்டும்
நினைவில் பொருத்திக்கொண்டு
அமாவாசை இருட்டில் சிரிப்பது
போலொருமுறையேனும்
சிரித்து விடு.

பாட்டியிடம் இரவுக்கதைகேட்கும்
ஒரு சிறுமி போல், உன்னை
நினைத்துக் கொள். நான்
காதல் சொல்லி விட்டுப்
போகின்றேன்.

சொல்லி முடித்தபின்
மறுத்தாலும். .,
காதல் ஏற்படுத்திக்கொடுத்த
உணர்வும் நிகழ்வும்
உன்னைப் பின்தொடர்ந்து
வந்து கொண்டேதானிருக்கும்
பின்னொருநாளில்,
அக்காதலை நாமிருவரும்
சேமித்து வைக்காமல்
செரித்து விட்டாலும் கூட..!

Next மீட் பண்ணுவோம்
♠ராஜூ♠

குறிப்பு: இன்று முதல் இங்கு(ம்)..!

நெஞ்சமெல்லாம் காதல்..

2009-11-10T14:57:00.000+05:30

தமிழை செம்மொழி என்று
அறிவித்திருக்கிறார்களாம்..
நீ பேசுவதை கேட்டிருந்தால்
தமிழை தேன் மொழி என்றிருப்பார்கள்..

*******

காய்ச்சலடிக்கிறதா என்று
நெற்றியில் கை வைத்தாய்..
காய்ச்சல் போய், இப்போ
காதலடிக்கிறது..

********

உன் பெயரிலில்லுள்ள
அந்த
மூன்று உயிர்மெய்யெழுத்தும் தான்
மெய்யாலுமே
உயிர் உள்ள எழுத்து..

*******

இப்பொழுதுதான்
பார்க்கிறேன்..
ஒரு குமுதம்,
விகடன் படிப்பதை..

******

உலகின் மென்மையான
ஆயுதம்
உன் உதடுகள் தான்..

******

ஒவ்வொரு முறை
உன்னோடு பேசி முடித்து
போனை வைக்கும் போதும்,
இன்னும் ஏதோ ஒன்று
மிச்சமிருக்கிறது..

அத்தைக்கு பிறந்தவளே..

2009-10-01T12:27:00.005+05:30

அத்தை பொண்ணு / மாமா பொண்ணு இதெல்லாம் சொல்றதுக்கு நல்லாத்தான் இருக்கும். ஆனா நெஜத்துல ரொம்ப கொடுமை அது. அதுவும் அவங்க கொஞ்சம் அழகா இருந்துட்டா போதும். அவங்க பண்ற அலப்பறை தாங்க முடியாது. அதுக்காக அவங்கள நாம லூஸ்ல விடவும் முடியாது. அவங்க பண்ற கொடுமைகளை தாங்கித்தான் ஆகணும்.

தனியா இருக்கும் போது கண்டுக்கவே மாட்டாங்க. ஆனா நம்ம வீட்டு பெரியவங்க முன்னாடி 'நான் ரொம்ப நல்லவன்' ன்னு காட்டறதுக்காக நாம ஒரு ஓரமா நிக்கும் போது தானா வந்து தோள்ல கை போடறது, முதுகுல அடிக்கறதுன்னு நம்மை நெளிய வைப்பாங்க..

எனக்கு அவசரமா ஒரு 50 ரூபா டாப் அப் போட்டுடான்னு சொல்லிட்டு கட் பண்ணிருவாங்க.. மிஸ்டு கால் கொடுக்க கூட காசில்லாம நம்ம பொருளாதாரம் இருக்கும்..

தப்பி தவறி நம்ம மொபைல் அவங்க கைல கெடச்சுட்டா அவ்ளோதான்.. ரொம்ப நாள் கஷ்டப்பட்டு, SMS அனுப்பற அளவுக்கு கரெக்ட் பண்ணி வச்சுருக்கற பிகர், இனிமேல் நம்ம பேரை கேட்டாலே காரி துப்பர அளவுக்கு பண்ணிடுவாங்க..

காலங்காத்தால போன் பண்ணி "எனக்கு ரிசல்ட் வந்துருச்சாமா.. பாத்து சொல்லுன்னு.." கொல்லுவாங்க.. நம்ம ரிசல்ட்டயே நாலு நாள் கழிச்சு பாக்கற நாம, அவ கிளாஸ் புல்லா எல்லாரோட ரிசல்ட்டையும் லைவ் கமெண்டரி பண்ண வேண்டிய நிலைமை வரும்.

வில்லு படம் சூப்பரா இருக்காமா.. டிவிடி வாங்கி கொடுன்னு கொடுமை படுத்துவாங்க.. வில்லு டிவிடி இருக்கான்னு கேட்டா திருட்டு விசிடி விக்கறவன் கூட நம்மளை திருதிருன்னு பார்ப்பான்..

சரி நம்ம மேல இவ்வளோ உரிமையா இருக்காளே, நம்மள லவ் பண்ணுவாளோன்னு கற்பனை குதிரைல ஏறும் போது, 'என் கிளாஸ் மேட் ஒருத்தன் சூர்யா மாதிரியே இருப்பான் தெரியுமான்னு' குண்ட தூக்கி குதிரை கால்லயே போடுவாங்க..

வீட்டுக்கு காய்கறி வாங்க கடைக்கு போறத கூட கௌரவ கொறச்சலா நெனைக்கற நம்மள அப்பப்ப டிரைவராகவும், பாடி கார்டாகவும் யூஸ் பண்ணுவாங்க..

இப்படி அத்தை பெத்த அழகிய ராட்சசிகள் பண்ற அன்புத் தொல்லைகள் ஏராளம். என்னதா கொடுமை பண்ணினாலும், 'போடா லூசுன்னு' அவ செல்லமா அடிக்கும் போது கிடைக்கற சுகம் இருக்கே.. அதெல்லாம் அனுபவிச்சாத்தான் தெரியும்..

***********************************

டிஸ்கி : இது ஒரு மீள் பதிவு. எனது இன்னொரு வலைப்பூவான அச்சம் தவிரில் சில மாதங்களுக்கு முன் எழுதியது. இங்கே ரொம்ப நாளா கடை காலியா இருக்கறதால இங்கே எழுதி இருக்கேன்.. பொறுத்தருளவும்...

பிரிவையும் நேசிக்கிறேன்..

2009-09-10T19:54:00.003+05:30

உன் பெயரை,

உன் பரிசத்தை,

உன் பெண்மையை,

உன் அருகாமையை,

உன் அழகை,

உன் அதட்டலை,

உன் அன்பை,

உன் வார்த்தையை,

உன் வசீகரத்தை,

உன் நிழலை,

உன் நாணத்தை,

உன் வாசத்தை,

உன் சுவாசத்தை ,

உன் கோபத்தை,

உன் கொஞ்சலை,

உன் நடையை,

உன் நளினத்தை,

உன் மச்சத்தை,

உன் முத்தத்தை,

எல்லாவற்றையும் நேசித்திருக்கையில்
காதலை உணர்ந்தேன்..

இப்போது உன் பிரிவையும் நேசிக்கிறேன்..

சாதலை உணர்கிறேன்..

வார்த்தை தவறிவிட்டாய்...

2009-09-08T11:13:00.005+05:30

இதுதான் உலகமென
புரிந்த வயதிலிருந்து
நீ தான் வாழ்க்கையென
வாழ்ந்திருந்தேன்..

அழகும் நீதான்,
எனக்கு தெரிந்த ஒரே
அழகியும் நீதான் என
கவிதைகள் எழுதி வந்தேன்..

ஆசை குழந்தைகளோடு
அன்பாய் வாழ்வதாய்
நிதம் ஒரு சொப்பனம்
கண்டு வந்தேன்..

காலமெல்லாம் உன்னை
கைப்பிடிப்பேன் என்றெண்ணி
கண்ணும் கருத்துமாய்
காதலை வளர்த்தேன்..

கனவு கை கூடுமென
நினைத்திருக்கையில்
கல்யாண மாலையோடு நிற்கிறாய்
மாற்றானோடு..

இது தான் விதியென
ஏற்றுக்கொள்ளலாம்..
இன்னார்க்கு இன்னார் என
எழுதியிருப்பதாய் தேற்றிக் கொள்ளலாம்..

ஆனால்
அம்மாவை கேட்டு அழும்
நம் கனவு குழந்தைகளுக்கு இனி
என்ன பதில் சொல்வேன் ..

காதலிக்க கற்றுக்கொடுடி!!

2009-08-28T10:16:00.005+05:30

புத்தகத்தில் எழுதியிருந்த
என் பெயரின் முன்னால்
உன் பெயரை எழுதி
காதலை சொன்னாயே !!
அந்த நுணுக்கத்தை...

ஊரெல்லாம்
வாயாடி என
பெயரெடுத்து விட்டு
என் தாயிடம் மட்டும்
நல்ல பெண் ஆனாயே !!
அந்த வித்தையை...

உன் வீட்டில்
எல்லாரும் இருக்கையிலும்,
பயப்படாமல் என்னையே
பார்த்துக் கொண்டிருப்பாயே !!
அந்த தைரியத்தை...

என்னோடு வருவதற்காகவே
உன் சைக்கிளை
பஞ்சர் செய்வாயே !!
அந்த திருட்டுத்தனத்தை..

உன் அப்பாவோடு நான்
பேசி கொண்டிருக்கையில்
அவருக்கு பின்னால் நின்று
உதடு குவித்து கொஞ்சுவாயே!!
அந்த குறும்பை..

உனக்கு பிடித்த மஞ்சளை தவிர்த்து
எனக்கு பிடித்த நீலத்திலேயே
அதிகம் உடுத்துகிறாயே!!
அந்த ஆசையை ...

என் வீட்டு பூனைக்குட்டி
உன்னிடம் மட்டும்
அதிகம் ஒட்டிக் கொள்கிறதே!!
அந்த விந்தையை...

என்னோடு எதற்கோ
சண்டை போட்டு,
இரவு முழுக்க அழுது விட்டு,
அடுத்த நாள் காலையில்
சிவந்த கண்களோடு 'சாரிடா' என்றாயே !!
அந்த அன்பை..

நான் சாப்பிடும் போது
யாருக்கும் தெரியாமல்
ஒடி வந்து, என்னை
ஊட்டி விட சொல்வாயே !!
அந்த பிரியத்தை..

எனக்கு
உடம்பு சரியில்லாத போது
இரண்டு நாள் முழுதும்
சாப்பிடாமல் இருந்தாயே!!
அந்த பாசத்தை..

எனக்கும் கொஞ்சம்
சொல்லிக்கொடடி கண்ணம்மா..
நானும்
காதலிக்க கற்றுக்கொள்கிறேன்..

காதலுடன்,

காதல் வளர்த்தேன்..

2009-08-11T10:49:00.011+05:30

உன் ஒவ்வொரு செய்கையிலும்
என் காதல் வளர்கிறது..
நீ நெற்றி முடி ஒதுக்கையில்
நூறு மடங்காய்..

********
மணிக்கணக்கில் யோசித்தும்
எழுத முடியவில்லை..
லேசாய் தலைசாய்த்து
ஓரக்கண்ணால் பார்ப்பாயே
அதற்கு இணையான கவிதையை..

*********
இதயம் துடிப்பது நின்றால்
எனக்கு மரணம் நிகழுமா தெரியாது
உன்னை நினைப்பது நின்றால்
மறுகணம் மரணம் நிகழும்!!

********

நீ பிடிக்கும் போது மட்டும்
தானாக வந்து சிக்கி கொள்கின்றன
பட்டாம் பூச்சிகள்..

********
'நான் என்ன அவ்வளவு
அழகாவா இருக்கிறேன்?' என்கிறாய்
பாவம் உனக்கெப்படி தெரியும்
கண்ணாடி கூட
கால்பங்கு தானே காட்டுகிறது
உன் அழகை!!

*******
தலைக்கணத்தோடு திரிகிறது
உன் மடியில் தினமும் துயிலும்
பூனைக்குட்டி..

*********

அழகு,
பேரழகு,
இந்த வார்த்தைகளின்
Superlative நீ!!

*********
நீதான் அழகி என்று
கர்வம் கொள்ளாதே!
உன்னை ஜெயிக்க பிறப்பாள்
நம் மகள்!!

*********

காதலுடன்,

அழகுக்கு மறுபெயர் நீதானே..

2009-08-05T12:32:00.006+05:30

உன்னை பார்த்த தேவர்கள் எல்லாம்
பிரம்மனிடம் கோவிக்கிறார்கள்..
ஏன் இப்படி ஒரு அழகியை
தேவலோகத்தில் படைக்கவில்லையென...
*********

நீ சோம்பல் முறிக்கும்
அழகை பார்க்கவே தினம்
சீக்கிரம் உதிக்கிறான்
சூரியன்.

*****

இறந்த செல்கள் தான்
நகமாக வளருமாம்..
நீ நகம் கொறிக்கையில்
இறந்த செல்கள் உயிர் பெறுகின்றன..

*****
இந்தியாவில் வசந்தகாலம்
பிப்ரவரி மாதத்திலாம்..
இருக்காதா பின்னே
நீ பிறந்தது பிப்ரவரி 19.

*****

என் வலது கண்ணில்
விழுந்த தூசியை ஊதினாய் நீ..
பொறாமையில் அழுகிறது
என் இடது கண்..

******

நிலவு பூமியை சுற்றுகிறதா,
இல்லவே இல்லை...
பூமியில் இருக்கும்
உன்னைத்தானே சுற்றுகிறது..

*******
காதலுடன்,

பிரிவின் வலி ..

2009-08-03T12:25:00.000+05:30

உன் பிரிவு, ஒரு மாயப்பிசாசை போல்
என் அறை எங்கும் வியாபித்திருக்கிறது..

பின் இரவு நேரங்களில் அது
பேயாட்டம் ஆடுகிறது..

ஆழ் மனதில் அடுக்கி வைத்திருக்கும்
உன் நினைவுகளை கலைத்து போடுகிறது..

உன் வாசனையை, அறை எங்கும்
நிரப்பி மாயாஜாலம் செய்கிறது..

காதல் வலியால் துடிப்பதை
குரூரமாய் பார்த்து சிரிக்கிறது..

பயந்த குழந்தையாய் போர்த்தி படுக்கையில்,
பக்கத்தில் படுத்து கட்டி கொள்கிறது உன் பிரிவும்.

கண்ணை மூடி தூங்க முனைகையில்,
காதல் கதைகளை உரக்க பேசுகிறது.

சிவந்த விழிகளோடு காலையில் பார்க்கையில்,
சாதுவாய் தூங்கி கொண்டிருக்கிறது அது.

அதன் தூக்கம் கலைக்க வேண்டாம் என
அறைக்கதவை மெதுவாய் சாத்தி விட்டு செல்கிறேன்.

உன் பிரிவு, ஒரு மாயப்பிசாசை போல்
என் அறை எங்கும் வியாபித்திருக்கிறது...
***************

கண்ணீருடன்,

தேவதை வம்சம் நீயே..

2009-08-01T12:05:00.001+05:30

வருடம் முழுவதும்
பூக்கிறது
நீ
ஊஞ்சல் ஆடிய மரம்..

**********

என்ன பாவம் செய்தோம் என்று
புலம்புகின்றன
நீ
சாப்பிடாமல் வைத்த
பருக்கைகள்..
**********

நான்கு வயதில் ஒருநாள்
தூக்கத்தில் சிரித்து கொண்டே
இருந்தேனாம்..

அன்று தான் நீ பிறந்திருப்பாய்!!

************

முதல் பக்கத்தில் எழுதியிருந்த
உன் பெயரை மட்டுமே
தினமும் படிக்கிறேன் ..

உன்னிடம்
இரவல் வாங்கிய புத்தகத்தில்...

***********

கடவுளின் விஸ்வரூபம்
போல்
காதலின் விஸ்வரூபம்
நீ !

**********

எல்லா கவிதை போட்டிகளிலும்
உன் பெயரை மட்டுமே
எழுதி வைத்து விட்டு
வருகிறேன் நான்..

கவிதை போட்டியில்
காவியம் எழுத கூடாதென
பரிசு தர மறுக்கிறார்கள்..

************

காதலுடன்,

யார் இந்த தேவதை...

2009-07-30T12:48:00.001+05:30

தேவதைகள்
எப்போதும்
வெள்ளை மட்டுமே
அணிவதில்லை..

நீ இன்று மஞ்சள் தாவணியில்..

*********
தினமும் நீ
என்ன நிறத்தில்
உடுத்தியிருக்கிறாய் என்பதை
ஆவலோடு பார்க்கிறேன்..

அன்றைய 'அதிர்ஷ்டக்கார' நிறத்தை தெரிந்து கொள்ள..

***********
நீ கண்ணம் வைத்து
பேசும் சுகத்துக்காகவே,
ஒரு ரூபாயில்
மணிக்கணக்கில் இயங்குகிறது

கடை வீதி 'காயின் பாக்ஸ்'..

********

பலருக்கு வரத்தால்
குழந்தை பிறக்கும்..
வரமே குழந்தையாய் பிறந்தது
உன் பெற்றோருக்குத்தான்..

********

எடுத்து வீசிய
பின் தான் வாடியது,
நீ தலையில் வைத்திருந்த
ரோஜா பூ..

********

நீ
கோவிலுக்கு வருவாய் என,
வெள்ளிக்கிழைமை தோறும்
சிறப்பு அலங்காரம்
செய்து கொள்கிறது சாமி..

*******

நீ 'ச்சே' என்று
சலித்து கொண்டு
மணி பார்க்கும் அழகுக்காகவே
உன் கல்லூரி பேருந்து
தினமும் தாமதமாக வர
வேண்டிக் கொள்கிறோம்

நானும் உன் கை கடிகாரமும்..

*******
மாமல்லபுர சிற்பங்கள்
எல்லாம் உன் சாயலில்..
உண்மையை சொல்
போன ஜென்மத்தில்
பல்லவன் ராஜ்ஜியத்தில் பிறந்தாயா??

********
எல்லா ரோஜா செடிகளும்,
மஞ்சள் நிறத்திலேயே பூக்கின்றன..
உனக்கு
மஞ்சள் ரோஜா தான்
பிடிக்கும் என
ஏன் சொன்னாய்??

********

யார் கண்டார்?
உன் வீடு
கிழக்கு நோக்கி இருப்பதால் தான்
கதிரவன் தினமும்
கிழக்கில் உதிக்கிறானோ என்னவோ??
*********

காதலுடன்,

உன் பேர் சொல்ல ஆசைதான்..

2009-07-25T16:51:00.000+05:30

சங்கீதமாய்,
ரம்யமாய்,
பெண்மையாய்,
யாழிசையாய் இருக்கிறது
உன் பெயர்..

அடைக்கலம் தருபவள் என்று
அர்த்தமாம் உன் பெயருக்கு..
அதை உண்மையாக்கு
என் காதலுக்கு அடைக்கலம் கொடுத்து..

என் பெயரை
யாராவது கேட்டால் கூட
உன் பெயரை சொல்லி
அசடு வழிகிறேன்..

எந்த மொழியில் எழுதினாலும்
அழகாய்த்தான் இருக்கிறது
உன் பெயர்..

உன் பெயரை சொல்லி
யாராவது அழைத்தால்
உனக்கு முன்னால் திரும்புகிறேன்
அனிச்சையாய் நான்..

அழகு குழந்தைகளை
பார்க்கும் பொழுதெல்லாம்
உன் பேர் சொல்லியே கொஞ்சுகிறேன்..
என்னையுமறியாமல்..

உன் பெயர் தாங்கிய
சாலையோர பெயர் பலகைகள் மட்டும்
அதிகமாய் மிளிர்கின்றன..

காத்திருக்கிறேன்..
எப்போது வெளிவரும்?
உன்பெயரில் தொடங்கும் திரைப்பாடல்!

கவிதை ஒன்று எழுத நினைத்து
காகிதம் பல கசக்கி, கடைசியில்
உன் பெயர் மட்டும் எழுதி முடிக்கிறேன்,
காவியம் எழுதிய திருப்தியில்..

காதல் மழை...

2009-07-24T17:28:00.000+05:30

காதலிப்பவர்கள்
சொர்க்கத்தை அடைவார்கள்..
காதலிக்கப்படுபவர்கள்
சொர்க்கத்தை உணர்வார்கள்..

**************

கலைந்து போன ஒரு மேகத்தின் கண்ணீர் துளி இந்த காதல் மழை..
நனைவோம் வாருங்கள்..